‘n Geloofsgevaar webinaar is gereël deur die GKSA Deputate Owerheidsake nadat die CRL voorsitter uitsprake gemaak het soos:
- We are going to set up a section 22 committee… who will help us push through legislation in parliament. It’s not business as usual around churches anymore
- The government lost control of the religious sector after 1994… and this must stop
Daar is óók ‘n brief geskryf aan die GKSA kerke. Onder is die brief wat gestuur is en die skakels na hierdie webinaar:
Webinaar lesings:
- Opening | Ds Pieter le Roux | Youtube
- Historical Reactions to State Intervention | Prof Andries Raath | Youtube | PDF
- CRL gevaar | Adv Pieter Aucamp | Youtube | PDF
- Die Owerheid as God se Dienaar | Prof Francois Muller | Youtube | PDF
- Wat kan/moet gedoen word | Ds Tommie van Vuuren | Youtube | PDF
- Vrae & Antwoorde | Youtube
Hier is die brief aan die kerke:
Die Deputate Owerheid van die GKSA wil u hiermee inlig oor belangrike ontwikkelinge rakende die CRL (Kommissie vir die Bevordering en Beskerming van die Regte van Kultuur-, Godsdiens- en Taalgemeenskappe) se huidige proses met betrekking tot godsdiens in Suid-Afrika.
1. Agtergrond van die saak
Die CRL het tans ’n sogenaamde “Artikel 22-proses” aan die gang, wat voorgehou word as ’n oop en vrywillige konsultasie met kerke en geloofsgemeenskappe oor selfregulering en aanspreeklikheid binne die godsdienssektor.
2. Werklike rigting van die proses
Onlangse openbare verklarings deur die voorsitter van die CRL dui egter duidelik daarop dat die bedoeling verder strek as bloot konsultasie. Daar word openlik gepraat van:
- die instelling van ’n statutêre raad vir godsdiens, en
- die aanvaarding van wetgewing deur die Parlement om sodanige raad te vestig.
Dit beteken dat die proses nie bloot vrywillige samewerking beoog nie, maar moontlik kan lei tot staatbeheer oor die godsdienssektor.
3. Implikasies vir kerke
Volgens die voorstelle wat tans bespreek word, kan die volgende ingestel word:
- Registrasie van kerke en geestelike leiers
- ’n Bindende gedragskode
- ’n “Sertifikaat van goeie status” vir nakomende instellings
- Sanksies vir nie-nakoming, insluitend deregistrasie
Hierdie elemente dui op ’n verpligte reguleringsraamwerk, en nie blote selfregulering nie.
4. Kernbeswaar
Die kern van die beswaar is nie teen aanspreeklikheid of etiese optrede nie. Inteendeel:
- Die kerk erken die noodsaak om misbruik en onreg aan te spreek.
- Daar bestaan reeds voldoende wetgewing in Suid-Afrika om onwettige optrede te hanteer.
Die beswaar is dat die voorgestelde raamwerk:
- die staat ’n rol gee om oor godsdiens-etiek en praktyk te besluit, en
- moontlik die grondwetlike reg op godsdiensvryheid kan aantas.
5. Huidige stand van sake
Daar is tans ook regsgedinge aanhangig wat die wettigheid van hierdie proses bevraagteken. Die uitkoms daarvan kan ’n wesenlike invloed hê op enige verdere ontwikkelinge.
6. Ons betrokkenheid as Deputate
Die Deputate Owerheid van die GKSA is ernstig besig met hierdie saak en volg die ontwikkelinge noukeurig. Ons is ook besig om die situasie deeglik te bestudeer en sal, waar nodig, leiding gee.
7. Toekomstige kommunikasie en betrokkenheid
Ons beplan om binne die volgende paar maande ’n webinaar aan te bied waarin:
- meer volledige toeligting gegee sal word, en
- oor die belangrikheid van ons kerke se betrokkenheid oor hierdie saak.
Verdere besonderhede sal betyds gekommunikeer word.
Slot
Ons versoek dat kerkrade en lidmate hiervan kennis neem en die saak in gebed aan die Here opdra. Dit raak die vryheid van die kerk om die Here volgens sy Woord te dien.
Broederlike groete
Deputate Owerheid – GKSA
NS. Vergunning aan FORSA vir die inligting oor bg. saak.
. 